據意大利傳媒《Football-Italia》透露，天津權健再向意甲拿玻里報價，希望以年薪2,000萬歐元（約1.7億港元）撬比利時射手梅頓斯過檔；而天津權健領隊簡拿華路早前都承認，球隊曾經接觸過梅頓斯。

29歲嘅梅頓斯喺今季為拿玻里上陣35場，射入25球兼交出11次助攻；佢更以20個聯賽入球暫列意甲射手榜榜首。不過，梅頓斯喺2018年就會約滿拿玻里，相信呢隊意甲球隊要留人都要付出唔少代價。