【新增影片】

日本喺星期二嘅亞洲盃16強賽事憑後衛冨安健洋上半場嘅入球，以1:0擊敗沙地阿拉伯晉身八強，冨安仲刷新咗亞洲盃最年輕入球者嘅紀錄。

沙地今場早段控球佔多，不過一直都冇辦法製造具威脅埋門。反而日本隊穩住陣腳之後，喺20分鐘就憑冨安健洋接應左路角球近門頂入致勝一球。換邊之後沙地嘅攻勢都唔係太入肉，無辦法扳平比數之餘，尾段仲幾次差啲比日本拉開比數，最終日本維持1:0勝局完場。

呢一球係20歲嘅冨安健洋射入嘅第一個國家隊入球，除咗協助藍武士殺入八強之外，佢仲刷新咗隊友堂安律上星期先至更新嘅亞洲盃最年輕入球者紀錄㖭。

不過晉級八強嘅日本近日就面對幾嚴重嘅傷停問題，正選前鋒大迫勇也雖然日前已經可以單獨操練，不過未知可唔可以趕及下一場復出。而日本陣中年紀最大嘅球員青山敏弘更加因為膝傷問題，星期二提前離隊回國接受治療，加上另一位前鋒武藤嘉紀下場亦需要停賽，球隊將會面對人手不足嘅問題。
--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM
--------------------
《體蘋果》陪你睇波講波
https://www.fb.com/appledailysports