麥明詩近日去咗蘇梅享受陽光與海灘，早前先跪求網民教water whip，喺泳池玩揈水髮，未知係唔係受浮力影響，佢個上圍忽然升cup由32B變咗C cup(新聞連結： https://bit.ly/2Gv719z )，連日佢都有喺IG貼旅行相，噚日麥明詩先話着泳衣曬太陽，隻手同背脊好紅好痛，似乎曬傷咗，原來佢潛水之後濕晒想曬番乾，惟有用毛巾遮一遮，被網民笑佢似「新時代木乃伊」，點知最尾仲曬傷埋隻腳掌。

咁去到咁靚嘅地方，晒吓身材都係好合理，剛才麥明詩喺IG再貼泳照，佢去咗馬德森島，相中見佢坐咗喺沙灘大晒美腿，曬出一身健康古銅膚色，面對靚景，佢有感而發：「當感到千斤重擔，或者諸事不順，就看一下多美麗的風景，想一下當地人每天無憂無慮，做個簡單的飯、賣個椰青、吹個海風，其實重擔是我們自己加在自己身上的，沒有人說一定要成功一定要名留青史，一定要吃米芝蓮、一定要拿個名牌手袋，有動力固然好，但當動力變成壓力，就要提醒我自己，一切都是自己的選擇，也沒必要絕望，放得下，就會有出路，btw呢邊有冇投資移民？」

唔少網民都問佢做咩「傷咗仲曬」，更有網民回覆「我諗妳最迫近眉睫嘅壓力，就係可能做甩皮詩」，麥明詩解釋呢張相係自己呻曬傷嗰日影嘅，今日先再post出嚟。