現年35歲嘅ViuTV女藝人黃心美(Scarlett)喺2015年底同台灣老公Thomas感情轉淡而決定離婚，回復單身之後嘅Scarlett專心工作，早前見佢一個人喺cafe飲嘢，煲住煙同人send語音對話，成程笑得好甜，未知係唔係同新男友傾緊偈呢(新聞連結： http://bit.ly/2soEIBz )!?

今日有周刊報道指Scarlett因為工作關係，經常孖住29歲嘅師弟陳安立(Brian)、即係保釣烈士陳毓祥嘅兒子，結果秘密拍拖2個月，Brian仲被影到出入女方嘅香閨。

Scarlett一直鍾意高大威猛嘅男仔，身高6呎嘅Brian自然係佢嗰杯茶，報道話佢哋因為鬼聲鬼氣，特別啱傾，好多時收工都會食飯，不過最初為免戀情曝光，所以好多時候會搵埋經理人三人行， 日前佢哋兩個喺旺角出席完活動，齊齊坐經理人架車返咗去Scarlett喺油塘嘅屋企。

過咗冇耐，Scarlett帶住佢對一對狗仔同Brian落街散步，兩個人邊行邊傾，行到地產舖門口又停低研究，事後心美接受周刊訪問，佢話大家只係好朋友，Brian想買樓，所以去佢屋企睇吓啲間格。報道亦提到身為大家姐嘅Scarlett除咗同四妺黃心穎感情好好之外，查實同二妹心妙、三妹心慧一樣咁好，二妹心妙喺2009年嫁咗俾澳門商人龔偉鵬之後，專心相夫教子，過少奶奶生活，三妺心慧本身係做空姐。據知Scarlett當年離婚後，冇要過贍養費，覺得要用自己賺嘅錢先有安全感。