電影《棟篤特工》喺中環一間酒吧舉行煞科宴，「巨胸翠如」鄧月萍、鄭詩君（C君）、羅蘭、張松枝、林雪等出席。喺戲中飾演指揮官嘅張松枝留鬚現身，佢話自己之前拍完Fox套《心冤》，嚟緊又會開莊文強嘅《無雙》，佢仲話自己同發哥周潤發會有好多對手戲，仲笑言會跟發哥同郭富城學嘢，之後又會去加拿大同泰國。問到啱啱小登科嘅城城喺片場係咪好風騷，張松枝話：「對稿嗰時我都有恭喜佢，佢好開心呀！（咁係咪恭喜佢做爸爸？）哎呀我哋好曖昧，淨係講『恭喜！恭喜！』（咦？要恭喜兩次？）唔係，我講10個恭喜o添！」張松枝重申城城冇提自己係咪將為人父，佢就乜都唔知。

早前張松枝被推為「港版孔劉」，而真嗰位下個月號就會來港開見面會，到時會唔會去見吓對方？張松枝話：「畀飛我咪去睇囉！我一家三口，3張飛。」之前被人話完佢似宋仲基，然後到孔劉，咁張松枝會唔會覺得困擾？佢笑住話：「我諗之後仲有其他，因為我似太多人，邊個紅就似邊個。（咁其實你有冇韓國血統？）咁要問番阿媽喎，係上世紀嘅事。」

同場嘅鄧月萍一見記者就問有冇見過黃子華啲尷尬場面，然後就話：「之前拍咗場戲，講我飲醉酒，將自己啲怨氣發洩喺子華身上，幫佢除皮帶時，點知整極都解唔開，最後要子華示範點樣除皮帶。」咁個尷尬位係……？「我未見過嗰款皮帶，原來內有玄機……」講到九唔搭八。

問到佢有冇掂到小子華，鄧月萍話冇，又話自己闖電影圈，但覺得自己不足，所以打電話畀鄭丹瑞（旦哥）請教：「旦哥介紹我睇一套美劇《Mondern Family》（摩登家庭），仲話睇完套劇再畀書我睇，但我仲未睇晒套劇。」