立法會10月開鑼，特區高官呢排齊齊隨風四散飛，開會交流研討等應有盡有，認真唔得閒。
首先係工商及科技局局長王永平噚日喺廈門出席國際貿易洽談會，介紹香港嘅優勢，副總理吳儀都有出席。保安局局長李少光，同埋環境運輸及工務局常任秘書長盧耀楨，就不約而同前後腳出發回國。李局長噚日去京、廣、深訪問，先喺北京會晤各最高單位要員，探訪08年奧運組織委員會，之後到廣州及深圳同公安廳官員會面，16號至返。盧耀楨就今日率領超過150人嘅建造業高層代表去新疆烏魯木齊參加大型研討會。
律政司黃仁龍就聽日展開訪美行程，18號先至返。仁龍仔今次行程緊密，由華盛頓去到紐約同三藩市，其中會喺四個午餐會致辭，又出席學術研討會及會晤人權監察成員等等。
高官此刻鳥獸散，八方相信「內打關係」、外搞「外交」都係為咗整靚個招牌，有利煲呔連任。