方廐「自動導航」上仗9月24號由雷神贏泥地千八米，隔咗三個禮拜，有番多少新鮮感，呢晚第二場吼番泥地，縮程至一哩再出擊，結果今場於何澤堯胯下取得連捷，五歲馬大熟大勇，冇雷神一樣掂，累積三W全贏泥地，場地性能突出。呢鋪益埋落飛黨豐收，事關「自動導航」閘前越賣越熱，打到着綠燈唔夠五倍開跑，最終WP中晒，落飛黨執約六百萬落袋。何澤堯獲封華將新一哥，季內累積九W，拋離贏馬次多華將鄭雨滇五Ｗ，氣勢十足。今場二、三名分別係「耀華盛甲」同「驪龍」，後駒贏完換人非佳兆，不過保到一席位置卻算有交代。
方嘉柏說:「『自動導航』是典型的香港賽駒，在多跑下更為成長，牠的泥地性能特佳，因此季初我把握機會，早就預算牠三戰泥地賽，即使快活谷賽事即將舉行，但我仍會部署牠主攻泥地，下仗將是六個星期後12月7日周日再上陣，希望再捷。」