陳豪、謝天華、陳展鵬、唐詩詠、歐陽靖（MCJin）同羅仲謙早排去咗馬來西亞出席「Astro華麗台2012節目巡禮」派對，當地電視台買咗無綫六個節目，包括《飛虎》、《真相》、《法證先鋒III》、《潛行狙擊》、《點解阿Sir係阿Sir》同新一輯《品味咖啡》，仲搞咗個《警惡懲奸，正義好戲》劇集系列，認真識搞噱頭。
陳豪早前喺大馬搞嘅咖啡店唔夠半年就執笠，但無損佢嘅人氣，佢喺台上最受歡迎，好多妹妹仔爭住上台同佢玩遊戲同合照。陳豪都好識做，唱完歌就同觀眾玩抽獎遊戲，仲將飛碟當禮物飛落台，搞到大家係咁搶。之後陳豪再拍住謝天華、MCJin同現場觀眾玩跳大繩，現場見陳豪身手靈活，跳得非常高，最後活動喺熱烈掌聲同歡呼聲中圓滿結束。

示範冲咖啡

第二日，華麗台又幫陳豪搞咗個品味咖啡工作坊，身為咖啡王子嘅陳豪，喺工作坊向一眾嘉賓介紹新一輯《品味咖啡》，又分享喺唔同地方拍攝時經歷嘅風土人情同咖啡文化，仲即席示範炮製咗一杯色香味俱全嘅咖啡，手勢有板有眼。