恭喜發財，先祝大家雞年行運，股運亨通。今日港股開市，港交所（388）照例舉行開市儀式，主席周松崗、行政總裁李小加同大家拜年，並向交易大堂嘅出市代表大派利是。
不過大家有無發現，交易大堂越來越少出市代表，平日極之冷清，港交所今年同業主傾續租時，可能要諗諗佢，仲要唔要租咁大地方呢？
交易大堂嘅業主係政府，聽講政府貼市價收租㗎。華華上星期落去交易大堂睇過，現場200個交易櫃位，最多只得廿名出市代表，大部份交易櫃位都孤零零，地方偌大但欠缺人氣。

只餘約40名出市代表

但呢個都係大勢所趨，交易大堂1986年啟用時，所有交易都要喺度進行，1993年高𥧌期就曾經逼爆1,400名出市代表。及至1996年場外終端機出現，越來越多證券行棄租交易大堂，直接喺證券行落盤方便管理。3年前呢度仲有大約70名出市代表，家陣減到40名左右。
據講，證券行向港交所租用交易櫃位，每個月租7,000至8,000元，眼見越來越少證券行租用，港交所為咗開源，近年已經將其他地方出租畀人舉行酒會、研討會之類，甚至舉行無火煮食嘅晚宴都得。
嚟緊佢哋傾續租，都要了解仲有幾多證券行租用交易櫃位，諗清楚點樣規劃呢度用途先得嘞。

李華華
mailto:[email protected]