本港今早（15日）天陰有毛毛雨，唔少騎師操完馬都唔願做賽前訪問，因為個個都濕晒身，寧願快啲跑返宿舍沖番個熱水涼，唔想喺戶外地方逗留咁耐，免得冷親感冒。

正喺呢個時候，練馬師方嘉柏突然路過，非常樂意幫忙做受訪者，談談明晚（16日）谷戰旗下馬的機會，於是他登時成為記者們寵兒。

其中第三場四班1650米，「自然君子」來港後喺田草跑過兩場，走勢並唔失禮，初出1200米喺潘頓胯下追入第六名，上場出戰1400米配麥偉利有前有後跑入殿軍，走勢可人，因此吸引到潘頓注意，今場拎返嚟自己騎。

方仔明晚佈下強陣，除補出嘅「成才」及從未跑入獎金名次嘅「勝利新星」外，其餘五匹戰駒都強配潘頓，被問到「自然君子」係唔係今場一路奇兵時，方嘉柏笑指呢匹四歲馬只得邊線機會，因為復課牠只較上仗有些微進步，而且對隻馬今場增程跑一哩，是否具備氣量並冇十足把握。

不過今日中午一開飛，「自然君子」熱到只得4倍左右，睇賠率就唔似初跑谷草旨在測試窄場性能咁簡單，到底係咪夠贏？屆時自有分曉！