聯想集團（992）業績連蝕兩季，精神領袖柳傳志孖住愛將楊元慶忙於諗計仔，拯救公司走出困境，之不過，吊頸都要唞吓氣，噚日端午節假期，兩位仁兄留喺北京忙裏偷閒，有冇拍住游龍舟水，華華唔清楚，但肯定兩位心情勁靚，飲得杯落，何解？因為集團高級副總裁劉軍成家立室，新娘仲係號稱中國身價最高嘅超級名模姜培琳㖭！呢件婚事或者可以為聯想冲喜吓，扭轉衰運。
男人四十（不惑之年）嘅劉軍，喺93年加入聯想，係現任全球8位核心高層之一，據報年薪過千萬，家負責制訂公司全球戰略同埋業務整合，咁睇嚟佢係楊元慶嘅親密戰友，前途無限。

郭台銘赴宴送大禮

至於嬌妻姜培琳貌似荷李活影星CatherineZeta-Jones，行年三十，香港市民未必咁熟識，但佢喺國內好出名，本身係排球選手，後來因傷退役，99年參加上海國際模特兒大賽攞亞軍，展開銀色旅途，兼且頭銜多多，包括大學客座教授、時尚節目主持、專欄作家……係咪旺夫將來先知，但已經幫老公增加曝光率。
噚日婚宴上，仲有台灣富商郭台銘親赴北京送大禮，究竟係男家定女家請客就無從稽考，之不過，華華更想了解，柳傳志有冇同郭台銘密斟，交流營商心得，甚至探討兩強聯手嘅可能呢？

李華華
mailto:[email protected]