大陸綜藝節目《蒙面唱將猜猜猜》以蒙面唱歌叫嘉賓同觀眾估身份作招徠，繼上次李克勤上節目巫啟賢用誇張表情聲稱估唔到對方係邊個之後，又有張智霖扮「外星人」上節目唱歌，今次又有大家熟悉嘅香港歌手上咗去，早前預告大家都已經估到係邊個㗎喇（新聞連結： http://bit.ly/2xrqdQD ）。

噚晚節目播出第一期，一開始就懷疑係黎明扮嘅「煎蛋俠」出場，出場唱咗首大陸青春偶像組合嘅《青春修煉手冊》，見「煎蛋俠」又唱又跳，非常high，在場觀眾例牌好熱情，之後「煎蛋俠」表演佢嘅成名絕技，煎蛋。

雖然唔知點解要煎蛋，但係「煎蛋俠」喺煎蛋時，講嘅金句「不同的火爐，不同的溫度，不同的蛋，不同的蛋的種類，煎出來有不同效果」，其實都令到觀眾「估到」佢嘅身份，煎完蛋，「煎蛋俠」就再唱咗首孫燕姿嘅《遇見》，其後就到嘉賓發問時間，問到佢點入行，「煎蛋俠」答選秀，問佢唱歌最大成就係乜？「煎蛋俠」就話算係最受歡迎男歌手，問到佢仲有啲咩，「煎蛋俠」答拎過影帝，嗯…其實都呼之欲出啦，所以今次節目就出奇地果斷，直接公佈咗「煎蛋俠」就係黎明。

堂堂四大天王之一，嘉賓都好好奇點解會敢上呢類節目呢？黎天王就話其實從來冇諗過敢或唔敢，只係因為覺得呢件事好玩，又值得佢去玩，所以佢就嚟喇，而且佢覺得幕後班底都好年輕，作為一個演員有機會學習下都係好事。