【師兄你點睇】八戰四冠二亞！田泰安有隻質新馬穩勝（賴維銘）
蘋果日報 2019/12/26 06:00
田泰安賴維銘偉大勝利健快聯盟師兄你點睇
賴：前騎師賴維銘
記：記者吳文輝
記：記者吳文輝
記：韋達今季正式從練，表現越嚟越好，最近更頻頻以初出馬取勝，練馬功力越見成熟。
賴：要訓練新馬一出即勝絕不容易，其實韋廐馬匹整體表現唔錯，部份未勝出的舊馬，相信好快都可以贏馬交代。
今晚（26日）谷中第三場四班1650米的「偉大勝利」，係韋達陣營跑了好幾場而未有上名紀錄之馬，不過演出已明顯改善。
「偉大勝利」上場於國際騎師錦標賽次關抽到由川田將雅策騎，起步唔太慢，因應指示留到最後競逐，早段有點鬥口。
該場步速好慢，留後馬本來已不利，轉入直路搵位衝上一度遇到阻礙，不過望空後瘋狂撲上跑第四，末段締出22秒76。
全晚四組1650米只慢過「勤德兼備」百分一秒，而「偉大勝利」實際只衝了200餘米，認真犀利。
韋廐戰意如虹，呢次用到莫雷拉擺明車馬，成熱門都要捧場。
記：講到成績好，田泰安贏完國際騎師錦標賽後，表現仍一直標青，今晚戰馬實力亦強，相信又會有頭馬見面。
賴：不妨留意田泰安第八場二班1650米「健快聯盟」。此駒出賽八次唔多，已累積四冠兩亞，確實是一匹好馬。
牠過去只跑過一次谷草，乃上季服役初出，得第五名唔太曳，細場冇問題。
上仗田草1600米排大外檔起步，快步速下沿途走外叠，入直路首先出頭，最後仍捱到入Q。
「健快聯盟」當時只被今季fit爆的「友誼至好」越過，表現好之餘，氣量亦充沛，呢次跑1650米肯定冇問題，可期坐位望贏。
