【新增內容】

楊洛婷今日以bra top長褲造型，喺牛頭角拍攝收身廣告，佢透露自上年9月誕下囡囡Tanya之後，一直未能成功收身，經朋友介紹下，嘗試去紮肚做機，個幾星期做咗3次機後，已見成效，直至現時已回復未生之前嘅體重，仲喜獲老闆娘邀請擔任代言人，佢好開心咁表示有6位數字酬勞。

雖然收身成功，但見佢嘅上圍依然豐滿，露出3吋事業線，楊洛婷表示：「因為做機淨係做手、腰同臀部，所以上圍冇變過，加上我o依家餵人奶，反而大咗；其實我生之前肥咗3、40磅，o依家回復未生之前，同埋都好結實，又冇反彈。」老公黃天翱（Tim）滿唔滿意佢嘅身型？楊洛婷笑住話：「梗係滿意啦，我肥嘟嘟嗰陣，佢都話我好索，我仲以為自己好靚咁出活動，點知被記者影到我背脊好肥，oh my god，師奶身形走晒出嚟，我拎住張相畀佢睇，佢話係相機嘅問題，所以嗰時都好大打擊，我以前著泳衣好索㗎嘛，所以我下星期同朋友去古巴，我要影番輯再索啲，我已經買咗10套泳衣。」

講起阿Tim，佢今日同Dear Jane隊友喺旺角出席職安活動，同場仲有甄詠珊等人。Dear Jane話好耐未試過喺室外演出，所以特別興奮：「早幾年我地都試過喺旺角行人專用區busking，嗰時自己造埋舊電，有次落雨差啲電死。不過而家好難再去啦，好難同啲大媽爭位。」佢地仲話想喺沙灘舉行戶外音樂會：「我哋着三角泳褲，個結他啱啱遮住好似冇着咁，正呀！」至於甄詠珊近日因為劇集而人氣急升，佢透露今年計劃出寫真及出碟，笑言為咗寫真要積極減肥，希望可以操到條馬甲線出嚟咁話。

精選娛聞，喺晒《娛果》
http://fb.com/appledailyent