《延禧攻略》hit爆，一班演員陸續嚟香港同fans會面，繼「富察皇后」秦嵐早前率先嚟香港出席品牌活動之後，聽日《延禧》大軍殺到，準備後日同香港市民慶中秋。

富察皇后亦會喺今晚大慨11點會再到香港，聽日下午4點，飾演爾晴嘅蘇青會先飛到香港，跟住下午5點輪到「魏瓔珞」吳謹言，飾演「富察大人」傅恆嘅許凱，就會喺下午5時40分抵港，同《延禧》大軍包括繼皇后佘詩曼等一齊，參與星期一中秋節上午11時半至下午2點喺將軍澳電視廣播城嘅《延禧南巡》錄影。

當日錄呢個節目嘅，仲有陳豪同黎耀祥，莫非大台想嚟個《金枝慾孽》、《大太監》跟《延禧》crossover？

呢個《延禧南巡》會安排喺今個月30日晚播出，星期一《延禧》大軍錄影完呢個節目之後，就會一齊接受傳媒訪問，但秦嵐就因為有事要先離隊搭飛機走人。

到咗中秋夜晚上8點至9點15分，魏瓔珞、傅恆、爾晴會去到馬鞍山新港中心同市民慶中秋，連《延禧》製作人于正都會現身，當晚大台仲會喺8點半進行3分鐘直播。

呢股《延禧》熱，帶挈23歲大陸小鮮肉許凱人氣大升。今日許凱接受香港傳媒訪問，模特兒出身嘅佢，同吳謹言同一間經理人公司，佢話由頭到大未試過剃光頭，所以拍《延禧》剃完光頭之後幾日，自己好唔習慣，仲有啲崩潰。

講到佢喺劇中勁討厭佢老婆爾晴，許凱話試過發噩夢見爾晴攞刀斬自己全家㖭。許凱又話自己係張國榮fans，而喺咁多香港演員中，佢最想同劉德華同苗僑偉合作。

精選娛聞，喺晒《娛果》
http://fb.com/appledailyent