財經專欄作家周顯與「魔童」王維基原本大纜都扯唔埋，點知最近嚟個隔空筆戰。周顯出名係八卦公一名，乜都講一餐，早排佢喺專欄畀條橋魔童，教對方捧新人做明星，幫港視（1137）站穩陣腳，身經百戰嘅魔童就唔領情，寸番周顯唔識嘢！
周顯上星期以「如何搞起一個電視台」為題寫專欄，佢認為一套電視劇，明星嘅重要性遠高於製作，N年前嘉禾之所以做得有聲有色，就係因為發掘咗李小龍、許冠文同埋洪金寶等。
周顯跟住咪建議港視參考呢套，捧靚女、型仔新人做明星，捧到佢哋日日見報做偶像，只要幾個明星彈出，電視台就容易站穩陣腳咁話。因為係新人，所以電視台要簽佢哋10年經理人合同㖭。

簽10年死約或有違人權

寸嘴嘅魔童當然唔係睇完就算，噚日突登透過專欄寸番周顯「對我們及行業不太了解」，即係唔識嘢喇。王維基話，電視台最重要係建立品牌聲譽，並非靠個別演員嘅號召力。
而且，同演員簽10年或20年死約嘅話，呢類合約多數違反人權，法理依據不穩固，所以電視台不能建立喺幾個明星之上。王維基臨尾腰膶多句話「雖然80年代一些電影公司都是因為一些明星才冒起，但最後卻逃不過倒閉的命運」，周顯提到嘅嘉禾，咪已經賣盤囉。
王維基其實真係寸得起，佢先後開拓IDD市場同創辦香港寬頻，兩者都成功賺大錢，雖然未知港視掂唔掂，但佢前後搞咗5年，由唔識到識，其間跌跌撞撞，覺得一個財經專欄作家講嘅嘢唔在行，都可以理解嘅。
周顯噚日回應話，呢單嘢𠵱家好似一個影評人批評套戲唔好睇，就俾人話佢冇拍過戲咁喎。

李華華
mailto:[email protected]