剛啱一期（27日）谷中夜馬，第八場苗禮德馬房「星洲司令」開齋出自貝湯美之手。

呢位大摩馬房主帥當時表現神勇，居然連自己友都冇面俾，砌低波士旗下「美麗鉅星」；後駒於潘明輝胯下跑到一絕都要輸，苟非如此，火車潘就可以繼上次（23日）日賽贏出「勝利歡星」之後，再替外號盃王的大摩建功。

潘明輝近兩戰各策一匹摩廐馬表現醒神，名次非冠則亞。外號火車的他突然間受到大摩器重，不知會否跟「確威風」有關。

該駒一向唔屬於快馬一族，過往入位跑法都係稍留，點知月中（17日）一場沙田草地千二米，在潘明輝策騎下竟採取沿途帶放戰略，搞到該場頂頭大熱「君達星」全程埋唔到欄，最後就由廐侶「得勝駒」後上一攻而破，爆出13倍冷門。

潘明輝於該賽之前，季內與大摩合作未嘗上名，最近則頻獲關照，今次（1月1日）沙田日賽再替「確威風」壓陣有七磅減，話唔定可以好似一陣風咁放返嚟，從而令輝、摩組合重開勝門。