奧運馬術賽悶唔悶？馬術在歐洲開始，即使在歐洲，亦非大眾化運動，同足球、網球、籃球、橄欖球、板球冇得比。我哋睇電視播出英國人印度人打板球，夠話悶啦，悶之根源，在於不明白該項運動之規則及評判或勝負標準，故此一般大眾話馬術好悶，可以理解。但新聞工作者係唔係只識得有碗話碗，有碟話碟，使唔使自己（如果要負責報導奧馬嘅話）花啲時間，研究馬術項目呢？坦白講，如果一萬二千人入場，有二千人完全識得欣賞，香港作為「紐倫港」之一，可講真正當之無愧。左丁山事先一啲都唔識，幾個月嚟陸續睇番啲資料（互聯網有好多好多），喺BBC睇過有關紀錄片，叫做識少少。上星期六晚入場，就傍住學習馬術幾年，心甘情願入馬房（屯門騎術學院）服侍馬匹嘅靚女K，聽佢解釋。靚女K話一定要聽住即場評述，佢用手機，左丁山用微型收音機，調校至FM106.7或103.2，前者講廣東話。左丁山兩個台都聽埋，比較之下，英文兩位女評述多術語，少指導，連主持人（男）都叫兩位ladies以淺白語言解釋；中文評述（據靚女K講，男嘅叫Danny，女嘅叫Boogie）就講得簡單明白，話明評判罰分嘅理由，及選手邊度出差誤。我哋啲外行人，到現場睇盛裝舞步，千祈要帶埋收音機，Danny與Boogie絕對幫到我哋欣賞馬術，唔聽唔得。
當晚有中國選手華天出場，估唔到呢位年輕人外表如此英俊不凡，穿上盛裝舞步選手禮服，戴一頂特高黑帽，接受訪問時講標準英國腔英文（佢係Eton學生），真係幾難相信佢係代表中國嘅選手。查番資料，先知道佢自十四歲起已在雙魚河學藝，曾就讀本港國際學校，如此人才，如果拍電影，金城武要行埋一邊。華天是晚表現得唔錯，可惜佢騎匹灰馬過份敏感，每次去到評判席之左角，就突然出現少許驚慌，踏步不自然，連累華天嘅分數，連廣東話評述員都大呼可惜。華天畢竟只有十八歲，與世界高手MarkTodd（紐西蘭）年齡相差一大截，而且華天要與師傅夫婦（澳洲ClaytonandLucindaFredericks）爭鋒，心理質素要好高至得，到咗2012倫敦奧運，華天可能成為馬術界寵兒，中國奪馬術金牌嘅希望。