人民幣越嚟越值錢,相反港紙越嚟越唔見使,買罐大陸罐頭都越嚟越貴,網友神舟7號就話:「以前喺大陸使港紙,個個見到都當你係上賓,但家吓上面冇人肯要,不如香港全面使用人民幣把喇!唔怕啲錢貶值。」
yylam713好同意:「揸住港紙日日貶值,冇鬼用,用人民幣好過。」Coco67就話:「廿萬換人民幣,足足唔見咗近7000蚊。」
TCL-SKY就唔多贊成:「人民幣咁污糟又容易爛,點用得過。」Mints2007亦話:「人仔咁多假嘢,而且紙質差,擺多幾個月都變草紙。」Adven話聽人講,「大陸銀行職員就係因為成日接觸人民幣,搞到染咗好多病。」Zoo8899就嫌人民幣唔好意頭:「人民『弊』咁唔好聽,唔好啩。」