當年今日
關於我們

廣瀨鈴又失言踩燈光師遭狂插

蘋果日報 2015/06/20 06:00

蘋果即時廣瀨鈴燈光師VS嵐大野智TUNNELS

今年最爆紅嘅日本女星,可以話係有村架純同廣瀨鈴之爭,但係17歲嘅廣瀨鈴最近頻頻衰多口得罪人,繼之前喺《VS嵐》入面話嵐成員大野智個樣老到似40歲阿叔之後,大前日喺搞笑組合TUNNELS嘅節目《託大家的福》入面,失言踩做燈光音響嘅工作人員,立即被網民瘋狂圍插。

鈴妹喺節目度話唔鍾意欣賞夜景、燈飾之類,佢話:「唔明啲人點解要搏命爬咁高去整啲燈飾。點解會有人大個咗之後想去做燈光?」仲話:「音響都係,點解要花自己嘅人生去為啲演員收音。」佢嘅發言聽落好藐視人哋工作,於是大批網民插到佢爆炸,兩日以來就已經有過5,000條留言指摘佢目中無人等等,插佢嘅留言仲有幾萬個讚。結果,鈴妹要喺噚日17歲生日當日喺網上留言道歉,不過,由於佢話係一場誤會,再俾人狂插佢唔知錯!