三星期前日本熊本發生兩次強烈地震，令到數十人死亡，大量房屋損毀，現時仲有萬多名災民要喺帳篷或者避難所中生活，連日來都有好多藝人去熊本探訪幫助災民，不過，大家都好掛住嘅當地吉祥物熊本熊就失蹤咗三個星期，搞到世界各地粉絲都好擔心佢，好彩熊本熊今日終於都出番嚟，仲去咗探訪災民。

創作熊本熊嘅小山薰堂早前接受訪問時，曾經講過自己見到家鄉熊本因地震受害，心情沉重，佢仲話唔知熊本熊好唔好喺呢個時刻出嚟，佢自己都唔知點算，結果喺地震後三星期，熊本熊趁今日係日本兒童節，終於都出番嚟，今早去到熊本西原村探訪小朋友，啲小朋友見到熊本熊都一窩蜂咁湧上去，個個見到佢都好開心，熊本熊亦有同小朋友一齊跳舞㖭。唔單只探小朋友，熊本熊仲去探埋住喺避難所嘅老人家，有老人家見到熊本熊嚟探訪仲感動到眼濕濕㖭！