《衝上雲霄II》劇力去到第八集已漸見疲弱，就連收視，都由官方聲稱嘅最高35點(約255萬人次收看)，跌到前晚一集，最高得31點(199萬人次收看)，即使出動埋三女連環性感演出，包括Chilam、梁政珏床戲、同全裸張嘉汶出浴戲，以及馬國明同胸懷大痣嘅林芊妤胸壓調笑戲，一樣唔掂。平均收視，只有29點（約186萬人次）。

CaptainCool(張智霖)同高級副機長馬國明風流若此(馬明第一輯明明係儍氣BB，唔知點解忽然性情大變!)，而且呢幾場「肉搏」戲毫無劇情戲味可言。無綫雖然未接投訴，但不斷於微博放風、想成全老公馬德鐘拍《衝上III》嘅馬太太張筱蘭暗寸無綫灑鹽花，今日佢已經喺微博寸道：「這樣艷色無邊的劇情，不但令觀眾吃不消，做演員的另一半看見毛管也豎直！」

大抵馬太今晚都有睇到《衝上II》，仍覺意猶未盡，於是方才又喺微博發功，再寸爆無綫謂:「今晚同大家分享馬德鐘這張手抱侄女超萌舊照片！唔多唔少我估她也因為你當年扮演『凌雲志』(即《衝上I》Vincent)飛機師，之後她也成為真正的飛機師，所以電視劇的威力絕不可低估！不過要勸勉現今年青人看了劇集後，別以為做飛機師去不同地方，就可以有不同女朋友！這混濁的思想必須糾正呀！」

最尾幾句，簡而清兼有力。有個學者太太，馬神真幸福!

至於馬國明就表示唔認同無綫灑鹽花：「只係裝飾啫，火辣戲係要突出Chilam角色嘅風流，咁嚴謹嘅劇唔使灑鹽花吸收視。」CaptainCool都話：「係劇情一部份，唔係劇嘅中心思想，仲有好多精采劇情，呢個都幾挑戰觀眾嘅底線。」