這天第七場二班千四米，整條大熱四重彩畀大家嘆，派彩僅得401元。全場最熱四駒依次係「包裝奔馳」、「日威夜威」、「天才」及「福毅」，結果前兩駒順序包Q，熱到只得3.2倍Q係全日之最，「福毅」則第三，「天才」殿軍。
獨贏熱到1.8倍，姚本輝馬房之後勁王「包裝奔馳」再一次顯露王者風範，今場在雷神胯下後上衝一段22.2秒話贏就贏，彈甩近兩身位，當成棚二班馬冇到，順利完成跨季四連勝，人馬合作同樣連贏四場未輸過。此駒服役至今八戰五冠兩亞，下仗約定大家喺一班賽甚至級際賽見，而雷神連同第二場另一匹大熱win賢廐「添好運」在內，亦告起孖，不讓韋達專美。
惡馬「日威夜威」本配柏寶，最終換何澤堯上陣，前者連同第五、六場分別騎唔到「閃耀鑽皇」(冠軍)及「超群名駒」(殿軍)在內，截至第七場賽後為止，今季開鑼日已經唔見咗一冠一亞一殿，大拿拿幾萬蚊獎金，你都咪話唔傷！