於2015年12月首播嘅大陸劇《太子妃升職記》，由大陸演員張天愛、盛一倫、于朦朧、江奇霖、郭俊辰等主演，當年劇集令張天愛爆紅，故事講處於現代嘅花花公子穿越到古代做太子妃，最後更成為太后。

劇集當年喺樂視播出時曾創下逾10億點擊率，風頭一時無倆。而今日根據海外傳媒報道，美國福斯傳媒集團（FOX）亞洲部成功購得《太子妃升職記》版權，並會拍成韓劇，合共20集，故事與原版一樣都係講花花公子穿越到古代做太子妃，陣容方面就未確實。

而大陸網民得知消息後都紛紛留言推薦韓版由邊個來擔任女主角，網民都一致推舉韓國女神全智賢做花花公子變成太子妃嘅女主角，仲留言話只接受到由全智賢來演出。有網民又留言暗寸大陸版，當年大陸版因為經費不足，所以好多特技、場面都簡陋百出，所以網民就笑言要傳授秘訣畀韓版劇組，就係一個字「窮」，又叫韓國劇組可以上淘寶購買道具，認真笑爆嘴。

更多韓流，喺晒《娛果》
http://fb.com/appledailyent