由梁家輝同鄭秀文（Sammi）主演、關錦鵬執導嘅《長恨歌》上個禮拜四（上月二十九號）上畫，首日票房得廿四萬。截至十月一號為止，累積票房就有百幾萬。為咗谷票房，導演同一班主角連日嚟馬不停蹄出力宣傳，好似前晚Sammi就同關錦鵬、家輝去咗港台接受訪問。
之前《長恨歌》、《如果．愛》同《神話》三部電影代表香港出線競逐奧斯卡「最佳外語片」提名資格，結果《如果．愛》成功出線。
關錦鵬講起呢單嘢，表現得好似好坦然接受，佢話：「都啱嘅，我係影協（香港影業協會）都揀番齣未參加過影展嘅啦！《長恨歌》去過威尼斯嘛！」關導演講到好似非戰之罪咁，但講講吓似乎又有啲酸，佢話：「入到圍當然聲勢大啦，但唔代表票房好，我哋冇輸到㗎。」

想拍同性戀戲

關大導話佢嚟緊會開拍《梅蘭芳》同一部女同性戀電影，《梅》片就等緊梁朝偉回覆接定唔接，Sammi就猛話好有興趣做，重話做男定女部份都得㖭！
講開又講，近排有傳話家輝唔滿意成龍本來講好畀佢做男主角、結果冇兌現，所以缺席《神話》宣傳。家輝當然否認，佢話不滿都唔敢嬲成龍，而且佢一早都知自己喺乜嘢位置，至於做唔到宣傳，只係因為同期做緊舞台劇啫！