陳冠希(Edison)近年不斷有是非纏身,加上佢嘅態度,更成為被網民惡搞目標。就連去夜場演出都可以失驚無神推撞保安;又試過「兇」記者寸到爆。EDC有乜嘢係做唔出?
正當EDC事業冇乜起色、又傳欠債之餘,終有貴人出現,導演彭發搵佢拍微電影《探靈檔案》,帶挈佢搵250萬人仔。為復出舖路,聽聞今舖係Edison翻身之作,所以佢好認真工作,認真到連對傳媒態度都180度轉變。
Edison噚晚喺銅鑼灣一間時裝店為國際DJ團隊EdBanger舉行簽書會,佢受訪時話: 「拍番電影嘅感覺好開心,本來我都想喺年底可以拍番啲嘢,依家可以叫做做到啦。」 隨後仲笑笑口好親切咁同大家講: 「我覺得自己今次有進步,以前成日都會發脾氣,但係依家冇乜,成件事都尊重咗。我期待觀眾嘅反應,我想啲人係鍾意睇我做戲,而唔係睇Edison。」 突然變得謙虛有禮,又收起藐嘴藐舌嘅表情。咁樣咪幾好囉。
噚晚Edison女友Ann都現身活動中,但一場嚟到都唔肯合照,講到女友係咪專登嚟捧場,Edison就話:「佢係嚟睇其他人嘅音樂會,佢唔使鍾意藝人嗰方面,鍾意我個人就得。」哦……
本報娛樂版舉辦的「萬千星虧頒獎禮」已經來到第五屆,今屆口號為「全民起義,網民話事」,換言之由網民一人一票選出心目中最虧代表,包括男主角、女主角、最虧節目及最虧場面。讀者可由即日起至本月14日、晚上11時59分之前,到以下網址( http://campaign.appledaily.com/tvawards2013 )投票。投票結果於本月16日在本報娛樂版及網上公佈。