【因為智叔?】接拍ViuTV校園劇 陳秀雯︰從來未試過咁舒服
陳秀雯拍劇廖啟智
陳秀雯、廖啟智與一眾年輕演員,今日喺坑口一間中學,為ViuTV新劇《教束》進行拜神儀式,飾演副校長嘅陳秀雯,已經有一段好長時間冇接拍劇集,佢指對上一套應該係09年拍大陸劇《跟紅頂白大三元》,當時同樣跟智叔合作。今次接拍其中一個原因,就係再跟智叔合作,另外因為係校園片,陳秀雯話︰「我以前睇好多校園片,我覺得每個年代都要拍,因為70、80、90同2000年代校園都唔一樣。」佢仲話自己未演過副校長,所以好吸引。
至於演校長嘅智叔指跟年輕監製、導演及一眾年輕演員合作,感受到一股衝擊同創意,佢笑話:「好多意想不到驚喜,冇能力去控制,自己都要時間組織。」陳秀雯亦指,導演比佢個仔細幾年,而新世代拍攝思想,佢亦覺得帶來新鮮感。
劇情主要發生喺學校,所以喺暑假結束前就要拍完,陳秀雯笑住話:「今次唔使捱夜,因為學校全部都係日頭戲,從來都未試過咁舒服。」除咗一貫校園青春劇情,導演加入唔少現時香港教育面對爆炸性問題,智叔指值得大家去睇,尤其係家長留意。
精選娛聞,喺晒《娛果》
http://fb.com/appledailyent