「人人期望可達到......叮噹啊，誰都喜歡你，小貓也自豪......」叮噹，即係多啦A夢，陪伴咗唔少香港人成長，今個周末佢又嚟啦！全港首個卡通人物跑步賽「DORAEMONRUN2016」，將於今個星期日係西九海濱長廊舉行，到時除咗有8000名參加者著住件多啦A夢tee一齊跑，形成一片「藍海」，聽講到時仲有打扮成「多啦A夢五子」：多啦A夢、大雄、靜香、小夫同胖虎嘅Cosplay現身同選手加油打氣。
早前1月底接受報名個陣，8000個網上報名名額，唔夠5個鐘就經已爆滿，可想而知香港有幾咁多多啦A夢的粉絲！報名費為350元，主辦單位話收益扣除成本後，將撥捐香港天使綜合症基金會。而完成賽事可以得到一個勁有紀念價值嘅「啦A夢限量完賽獎牌」。

報唔到名嘅多啦A夢粉絲都唔緊要，到時場內仲有一啲特色運動攤位遊戲，啱哂一家大細當家庭樂齊齊玩，出番一身汗。
賽事設有四公里個人組同兩公里繽紛組。個人組係計時賽，分別男子同女子組，10歲至60歲以上人士都可參加；繽紛組就係畀6歲或以上人士參加，不設計時，參賽者要係賽道越過三關：分別為巨型滑梯、三角迷陣、水管隧道。
「DoraemonRun」去年底就第一次衝出日本，係日本以外地方舉行，最終選址係台灣開咗3場，分別係台北三重大台北都會公園、台中東海大學同高雄澄清湖棒球場，每場吸引到過萬人參加，完成賽事可以拎到一個金色嘅紀念公仔。題外話，台灣去年同今年初舉行咗兩場海賊王「OnePieceRun」，唔知幾時到香港呢?

「DORAEMONRUN2016」
時間：3月20日上午8時至下午6時
地點：西九海濱長廊(九龍站D1出口，步行約10分鐘到達西九海濱長廊避西閘入口)
組別：個人4公里計時賽(上午8時至上午11時)
2公里繽紛組(不計時，須完成3個障礙)(上午11時至下午6時)
獎品：4公里首6名可獲神秘獎富獎品；完成賽事可獲獎牌乙枚
註：比賽前一天中午12時或之後後懸掛八號風球，或比賽當日凌晨12時或之後掛黑色暴雨警告，賽事將取消。

記者：余瑋