【韓流】聽日行禮 陀B李詩英晒甜蜜婚照
李詩英
現年35歲嘅韓劇《守望者》女星李詩英,將於聽日與拍拖1年嘅圈外男友奉子成婚,婚禮只招待親戚及好友,而今日李詩英所屬事務所公開咗李詩英嘅甜蜜婚照。
雖然李詩英未婚夫係圈外人,不過佢就未收收埋埋,大方喺婚照公開其暖男外貌,兩人仲不時甜蜜對望,真係Sweet到爆!據知拍攝婚照時李詩英已經陀緊B,不過當時仲未見肚,李詩英依然四肢纖幼,令粉絲大呼羨慕。而李詩英除咗換上身穿多套婚紗拍攝外,更孖未來老公着上韓服影婚照,夠晒傳統。
另外,韓劇《我們的甲順》38歲女星徐有晶,今日與年長3年嘅圈外男友拉埋天窗,婚禮以非公開形式舉行,徐有晶透過Instagram公開自己與老公十指緊扣嘅婚照,並留言表示好緊張。