當年今日
關於我們

【武漢肺炎】第三波爆發食客再減少外出用膳 食肆推優惠亦難「再出發」

蘋果日報 2020/07/08 17:50

食肆武漢肺炎第三波

本港爆發第三波武漢肺炎疫情,原料疫情緩和下生意「再出發」的飲食業再蒙陰影。雖然有業界聯合旅發局下周起推出飲食優惠,但市民紛紛表示會減少外出用膳,有食肆指昨日公佈多宗確診後,入座率有即時影響。

食肆林立的銅鑼灣渣甸街平日下午人流未算擠擁,多家食肆推出抗疫優惠,但下午茶時段都未如往日熱鬧,多家餐廳都有吉枱,部份食肆廚房員工疑因太熱脫下口罩處理食物,亦非每間食肆都謹守入座探熱規條。

陪家人購買外賣飲品的翟女士指,疫情緩和時的確有鬆懈,「疫情冇咁犀利梗係想出去啦,吽咗咁多個月,而家又爆返,仲話停課,真係會擔心,(小朋友)學少咗咁多嘢,都有影響,學校好似話停課,但都就嚟放暑假啦,冇啦喺屋企吽囉,今年都唔使旨意出去玩,(出街食飯?)唔會啦!冇乜必要唔會出街,咁多人。繼續戴口罩囉,仲有咩防禦措施呢?又冇預防針打。」

譚先生則指,疫情後仍有出去食飯,但最近再爆疫會較擔心,未來會減少出外用膳,多點留家食飯,「其實要做嘅措施都做足,戴口罩、個人衞生嗰啲,嚟緊可能會出少啲街,留意多啲餐廳防疫措施,如果冇做足都唔會入去。」

食肆「江浙滬」在門口貼上多張九折優惠宣傳,負責人之一鄒小姐坦言是為疫情推出,老闆擔心員工失業,所以推出優惠共同抗疫,「生意真係差咗好多,好老實我哋都係做返(提供)搓手液、隔板、探熱。政府派咗一萬蚊係多咗人出嚟,又冇限位,但同以前比係差咗,有時禮拜五六日繁忙日子都靜啲,呢條街係最旺,以前從來都未試過」。她指一有個案大家就像閉關不出來,昨日公佈確診個案後對生意有即時影響,但除了維持現有防疫措施,亦無更多措施可以再做。

上海香港麵家負責人顧先生指,疫情下本身已經坐得少人,今日即時再少了人來,惟有繼續探熱、提供搓手液等措施,現時晚市生意最慘淡,原本過去一個月「好啲啲」,如今又「差啲啲」,「冇辦法啦,(等佢)慢慢好返啲。」

-----------------------------
蘋果25年系列ebook《讀果》上架:紀實現場世界前線逆權之路叱吒風雲守護真相
-----------------------------
反送中一周年,《蘋果》整理大量涉及警察濫暴濫權等資料,製成詳盡資料庫,請按此閱讀圖表版本純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多