陳慧琳（Kelly）同張智霖（Chilam）今日喺太古城為代言嘅月餅出席活動，講到中秋節嗰日，Kelly表示唔使開工，屆時會同屋企人一齊過，小朋友亦會自製燈籠。對於Kelly喺13日生日，佢話未知到時點慶祝，問佢有冇收過囝囝嘅最難忘生日禮物？佢話：「冇呀，都係唱歌同送濕吻，咁樣已經夠喇，乖乖哋已經ok，老公就送speaker畀我，因為我要聽歌同練歌，本身嗰部又壞咗。」同老公過二人世界？Kelly笑住話：「唔使啦，4個都ok，咪當佢哋冇到囉！」身旁嘅Chilam唔知諗咗去邊：「嘩，咁開放！」

對於有傳好友郭富城個B女未出院，Chilam話：「我真係唔知，並無虛言，我哋近排好少聯絡，大家都拍緊戲，遲啲希望有機會再見面，我都好想從你哋口中知道佢嘅狀況。」Kelly似乎聽到一頭霧水，記者告知佢，有傳郭富城做咗爸爸，Kelly即話：「生咗喇？恭喜晒！仔定女？」記者話佢知道有傳係女，Kelly笑指唔係仔就係女o架啦！問Kelly有冇嘢要提點郭富城呢個新手爸爸？Chilam即刻提醒Kelly：「呢啲係假設性問題！」Kelly話：「最重要係配合老婆，老婆話乜就乜。」問佢同Chilam有冇交流湊仔心得？佢哋表示：「我哋嗰啲都好大個喇！」