曾經係韓國男子組合EXO及中國分隊EXO-M成員嘅28歲大陸藝人鹿晗，日前被發現同大陸藝人女友關曉彤去日本旅行拍拖。本來鹿晗有份喺大陸節目《這！就是歌唱．對唱季》擔任導師，但個節目噚日發緊急發聲明，話鹿晗因「個人原因」退出，搵咗張韶涵頂替。

不過，估唔到個聲明就引爆是非，網上流傳一張截圖，據稱係一位節目導演喺朋友圈發文，鬧爆鹿晗為愛沖昏頭腦，為咗陪女友去日本玩而no show，仲鬧佢完全不顧成組幾百人心血，亦不顧兩位藝人為佢調整檔期：「一群有夢的孩子、一群有夢的小編導，一起來做一個期待已久的節目，被一個不專業不敬業沒有藝德的導師徹底毀了......沒有藝德的藝人，到底能走多遠，我們拭目以待。」

對於被指冇藝德，鹿晗工作室噚日發聲明駁斥，話錄製期間都積極配合，已完成合約嘅全部義務，強調去日本是先前排好嘅工作，而並非臨時爽約，要求停止散播相關謠言，又話會保留追究法律責任權利。

至於《對唱》導演岑俊義亦話自己同團隊冇喺朋友圈批鹿晗冇藝德，但有網民就爆出曝出疑似節目製片人嘅朋友圈截圖，直指鹿晗喺節目開始錄影後突然提出檔期有問題，優酷方面多次同佢經理人團隊協商挽留，但都唔成功。

精選娛聞，喺晒《娛果》
http://fb.com/appledailyent