當年今日
關於我們

【短片】【希望堅持到6個月】岑潔儀餵人奶大方任睇

蘋果日報 2015/02/02 06:00

蘋果人奶即時岑潔儀Zoe

近排社會好多人士都提倡餵母乳,雖然有好多地方嘅配套唔係咁充足,但係都好多新任媽媽都好支持呢個做法。好似喺上個月中生咗BB嘅岑潔儀(Zoe),今日喺ig貼咗一張餵緊人奶嘅相,睇落真係好溫馨,記者打俾Zoe,佢話:「其實外國好多媽咪都會po呢啲相,呢張相又唔性感,反而係一張好sweet嘅相,所以我都好希望可以提倡,母乳真係最有益同無價。」佢仲話基本上全部朋友都係餵人奶:「我哋都係互相感染,佢哋仲過咗好多招數俾我,我都有叫啲就嚟生嘅朋友,叫佢哋餵母乳,對自己同BB都好!」雖然爹哋享受唔到餵奶嘅樂趣,不過Zoe話佢都好支持。

不過啱啱開始餵嗰陣,Zoe話真係好辛苦:「開頭未上奶,跟住佢一喊我又要餵奶,餵完又要揼,真係冇乜時間休息,不過我覺得幾辛苦都係值得,餵母乳係最有營養價值,而且令母子關係親密啲,係好sweet嘅一件事,係一個好好增進感情嘅方法。」Zoe話希望可以堅持餵到六個月,睇吓佢嘅成長速度再決定,0依家每一日都狂飲魚湯同食豬手,希望可以有足奶水。至於囝囝中文名,佢就話:「老爺奶奶幫佢改咗叫陳譽昇,我哋諗住會擺百日宴。」