噢！原來「細哨」朗拿甸奴坐埋一邊講電話，呢位球星戴住副超鬼咁有型，同架奧廸襯到絕，不過佢根本就唔識揸車。其實，「細哨」21歲登陸歐洲，一直有經理人兼哥哥阿斯斯湊住，咁多年來專心踢波，唔好話唔識揸車無考牌，唔識煮公仔麵都唔出奇啦！
話說回頭，呢排「細哨」心情應該好麻麻，因為AC上兩場波大勝對手，佢都只係坐後備席，令人覺得冇咗佢，球隊仲行得順！勢估唔到場內得個坐字不特止，今次場外玩車，都要眼光光睇住其他人玩，認真冇癮兼無聊。
不過，「細哨」嘅黑日子將陸續有來。《蘭斯體育網》周一報道，巴西警方逮捕一名叫Gigi嘅毒販，對方仲提到朗拿甸奴同曼聯球星路爾斯安達臣嘅名；Gigi表示雖然唔係直接同兩人交易，但中間人就提及佢哋個名，今次「細哨」真係水洗都唔清啦！
記得，之前「細哨」返國內參加世盃外，被踢爆落club喪玩，結果要以死鬼老竇嘅名義發誓，先得到加利安尼嘅信任。唔知今次捲入毒品事件，佢會點向會方解釋呢？