由韓國女團少女時代嘅允兒、《未生》男星任時完、韓版《步步驚心》洪宗玄主演嘅MBC新劇《戀愛中的王》將於下月17號首播。劇組繼噚日公開允兒嘅唯美古裝照後，今日就再公開主打海報，只見海報展示三角關係，三人喺海報中各自望住唔同方向，似乎各懷心事。

另外，同少時秀英拍拖近5年嘅男友鄭京浩，兩人於2014年1月公開戀情後，感情有增冇減，鄭京浩亦不時大方談及女友，近日鄭京浩上咗tvN嘅《人生酒家》節目，對於同秀英拍拖咁耐，覺得有乜魅力時，鄭京浩就話：「漂亮？已經5年了，唔算好長時間。」同時鄭京浩又話有時對秀英覺得好抱歉，話有時談及作品時提到女友，之後就會變成熱烈嘅話題，所以佢自爆上節目前亦有打畀秀英，秀英冇講乜，只見男友要着得靚仔啲，又提議鄭京浩唔好戴帽同埋唔好自己set頭，認真體貼。

同時鄭京浩亦提及第一次同秀英見面嘅情況，又自爆本身係少女時代嘅粉絲，喺朋友介紹下認識咗秀英，即時被秀英吸引住，對秀英可以話一見鍾情，佢自言甚少送上驚喜比女友，但試過喺1000日時，準備咗1000枝玫瑰花，不過估唔到原來1000枝花會咁多，搞到二人要一齊執拾。