網民狂玩"10 years challenge"，一打開Instagram或Twitter帳戶，會見到唔少名人同網民擺出10年前嘅相同現時嘅樣作對比，2009 VS 2019，係睇吓大家外貌嘅轉變，靜靜變老定係女大十八變，睇番網上資料，估計呢個挑戰係同facebook功能有關，每日提你幾多年前做過啲乜，先激發網民尋回舊記憶。

蔡卓妍、關智斌、何廣沛、林奕匡、趙希洛、盧巧音同趙學而等，有喺Ig貼相，何廣沛笑言人玩佢又玩，仲特登搵番一張out focus嘅相，網民都覺得佢個樣冇分別，而盧巧音睇番十年前嘅自己，就話「相差20磅」，仲話原來髮型同以前一樣，阿Sa就拎番自己10年前嘅開工相，忍唔住笑自己當時嘅髮型夠晒亂。

港姐馮盈盈喺Ig貼出14歲同24歲嗰陣嘅相，留言：「小姐，你邊位？」仲讚自己女大十八變，有網民就話「09年少女味、19年女人味」。

林奕匡貼出2009嘅相，當時佢當時身在外地，臉帶稚氣，10年後已成為人夫，佢留言：「見大家都玩，我又玩埋一份，其實新嘅一年，我影咗好少相。」網民讚佢靚仔咗好多。

至於，森美今午1點幾，貼出梳洗前後嘅相，挑戰10 minute challenge，寫道：「唔使等十年先有改變啦!朝頭早起身梳洗前同梳洗後，十分鐘都夠大分別啦！」

精選娛聞，喺晒《娛果》
http://fb.com/appledailyent