究竟人係愈老愈懵懂，定係愈老愈可愛呢？相信係一個好有爭議嘅論題，但係上周六嘅08年歐洲國家盃外圍賽，就有幾個老將殺聲震天，當中更有憑一己之力拯救國家隊；所以，我求大俠諗佢哋都係屬於「人見人愛、車見車載」嗰堆㗎喇！
第1個相信英超迷就好熟喇！佢係曼聯嘅蘇斯克查，佢喺作客匈牙利嘅比賽中梅開二度，令挪威大勝4:1。33歲嘅「蘇B」喺曼聯嘅表現大家有目共睹，我求大俠講多都嘥口水，今次搭飛機去到東歐咁遠都交到貨，真係抵讚！「蘇B」，你係得嘅！

列馬倫兩破波蘭大門

至於第2位老將，可能大家唔太同意，因為佢曾幾何時都風靡萬千女士兼同志，而且保養得唔錯，睇落去都唔似33歲，佢就係恩沙基喇！「大恩」喺歐洲賽幾乎一個人幫AC米蘭晉級，狀態凌厲，仲入選埋以年輕球員為骨幹嘅意大利大軍，已算不俗；估唔到仲入一粒幫國家迫和立陶宛，攞番1分，都算係為自己爭番啖氣。
第3個係「芬蘭飛人」列馬倫，佢轟入兩粒助國家隊作客3:1擊敗波蘭，唔講唔知，佢都成35歲人，真係連求大俠都要寫個「服」字畀佢！老實講，球迷遺忘咗列馬倫呢位仁兄都唔出奇，皆因佢04年離開咗阿積士後，輾轉間去咗瑞超嘅馬模，呢鋪威一威，都算食番尾糊啦！
「所以話呢，老馬發火，非同小可，唔好話求大俠長氣，平日對老人家要好啲，唔係吓吓到有事嗰陣先至『鍾無艷』嘅！」