當年今日
關於我們

【李八方online】娥特學嘢喇!美領事夠貼地 帶同事親自清理塌樹

蘋果日報 2018/09/18 16:17

美國駐港總領事八方山竹唐偉康

山竹遠離,我哋阿特首林鄭月娥一句「無相關機制評估法律後果」,拒絕港府帶頭全港停工,無視數十萬名打工兒女,無車又塌樹都要逼住返工,引爆民憤,林鄭真不愧為特區「堅離地」之首。想學「貼地」一啲,林鄭或者可以學下美國駐港總領事唐偉康(Kurt W. Tong)喇。
唐偉康今日响美國駐港總領事facebook度貼咗張佢去清理塌樹嘅相,構圖同新民黨葉劉淑儀嗰張「樹蔭有一隻蟬」都幾似,但唐偉康就唔係包住頭巾,而係戴住頭盔、著住反光背光同手套。睇真啲,唐偉康件反光背心雖然拉唔埋拉鍊,但佢都落手落腳清理塌樹。
唐偉康仲用中文同英文寫道:「今日領事館恢復運作。多謝同事齊心協力清理領事館附近路面。衷心感謝全港負責緊急維修同協助善後嘅工作人員、義工。」帖文出咗先1個鐘,就已成功吸咗42個like。
八方就好公道嘅,查實相似嘅帖文,林鄭噚晚都有喺佢facebook度post架,但就引爆「關公災難」,帖文post出至今17個鐘,吸嬲4,200個,不少網民留言炮轟林鄭,難怪林鄭今朝見記者時都話:「攞特首嚟出吓氣,係無問題既」。嗯,睇嚟學習認錯,比學習「貼地」更難。