曾經推出水著寫真而被封「宅男女神」嘅孫慧雪，去年12月同圈外男友羅天彥拉埋天窗，今年2月15日就喺社交網上宣布造人成功，話係最好嘅情人節禮物。

雪雪BB嘅BB預產期喺下個月，今日佢喺銅鑼灣利園現身老公好友嘅兒童服裝店開張，同場仲有丁子高同囝囝、麥子樂、王大業等。阿雪剪咗一頭清爽短髮，陀住巨肚，行路都要步步為營，麥子樂一見阿雪就笑話﹕「好脹，好似肥咗好多。」阿雪作狀拍打對方，鼓埋泡腮話﹕「乜真係肥咗好多咩？」

阿雪o依家心情好緊張，佢話﹕「我成日發惡夢，我入產房醫生唔幫我打止痛針，又發夢無端端穿氧水，唔知真定發夢，好擔心，因為好多人都同我講好痛。」阿雪表示有睇BB仔衫，希望以型格為主，佢話﹕「我又擔心照顧得嚟，又未有時間幫佢揀衫。」

對於Celine妹妹近日參加《全美一叮》比賽，阿雪話想有個咁醒目嘅小朋友，佢話﹕「我都想自己嘅細路有咁talent，每個父母都想。但唔一定係唱歌，會睇佢天生咩叻，俾心機栽培佢。」