【生生性性】最睇自己友台戲！姚本輝出動首席華將求勝
蘋果日報 2019/11/22 18:22
黎海榮何澤堯姚本輝首席華將生生勝勝
姚本輝（近）開始領先練馬師榜- 生生勝勝最叻跑過第三（香港賽馬會）
一向支持華將的姚本輝喺剛周三（20日）谷草夜馬豪取三冠一亞，今季頭馬數目增至17場，升上練馬師榜第一位。
當晚三場頭馬之中，「超霸無敵」同「新界之星」都係廿幾倍冷門，後駒衝過終點時，姚廐手足都特別興奮，原因唔只係「新界之星」嘅獨贏賠率有成28倍，而係鞍上人黎海榮。
原來Alex復出後，心知道自己太耐冇上陣，爭取支持並唔容易，佢就走多一步，每朝踏正5點就主動返到馬房幫手，無論馬匹有冇賽程，佢都樂意跨上馬背，策騎佢哋做熱身。
Alex未必係全港騎功最好嘅騎師，但就係每朝晨操最早開工嘅大師傅，工作態度認真主動，班手足同輝哥都有目共睹，提供座騎明撐，佢騎「新界之星」贏出個人季內第二場頭馬，自然戥佢開心。
今期（23日）騎練合作頭場四班1200米初出馬「百寶袋」，抽到11檔外檔起步，先觀望一場。
反觀姚廐第二場隻「生生勝勝」，上場季內初出角逐谷草1200米，只跑第10名，足足輸九個馬位，但鞍上人田泰安賽後一落馬就「媽媽聲」。
須知「生生勝勝」竟然先後喺大石鼓、轉彎中段同直路200米三度受阻勒避，令隻馬冇辦法掌握節奏，際遇差到無倫，簡直可以當佢上場冇跑過。
「生生勝勝」上場大敗後，馬會評磅員減佢一分，剛好可以降落第五班上陣。
今次即戰上季曾上名嘅1400米，遇上安仔停賽，輝哥搵到今季同佢合作愉快嘅首席華將何澤堯壓陣，仲要抽到1檔，必然拼個明白。