呢輪城中最熱爆嘅話題梗係特首當奴曾強銷慳電膽益姻親嘅新聞啦，小妹每日都追住嚟睇。話時話，小妹都有用慳電膽，但都係求其買，都唔知買膽有乜嘢學問，又要請教消委會啲老友。
老友話，想買慳電膽，當然係想慳多啲電啦。政府喺下月9日起實施強制性能源標籤計劃，首階段冷氣機、雪櫃同慳電膽必須貼上能源標籤；而標籤分五級，第一級能源效益最高、最慳電。所以消費者買慳電膽，一定要睇個膽能源標籤係第幾級。第一級同二級慳電膽嘅平均壽命達8,000小時或以上，而第五級平均壽命6,000小時以下，「一級比三級節能14%，比五級節能18%，都幾犀利。」

顏色要睇色溫

老友又話，慳電膽發出嘅顏色以色溫表示，如色溫低於3,500k一般稱為暖色，偏黃色，高過3,500k至5,000k之間稱為凉色，超過5,000k稱冷色或日光色，偏白。白光較冷但較清晰，黃光較溫暖舒服。巿面嘅慳電膽色溫主要分為2,700k或6,500k，消費者可按用途購買。
此外，慳電膽含有有害物質水銀，想買一啲含水銀量較少嘅慳電膽，可以買一啲經過測試證明符合歐盟嘅電器及電子設備使用有害物質（RoHS）嘅環保指令，即係每個慳電膽內嘅水銀含量唔會超過5毫克。
電郵：mailto:[email protected]