近年娛樂圈多咗一股生仔熱潮，尤其年過30歲嘅女藝人，婚後都會好努力造人生BB。陳茵媺、陳敏之同胡杏兒都係成功例子，佢哋產後依然keep住幕前演出，所以得閒更新網站，晒吓家庭幸福就少不免。

38歲嘅胡杏兒年初時要停工休養身體，最後一索得男，為沙頭角禾坑村圍村人兼長子嘅李乘德(Philip Lee)繼後香燈。咁威威，一家人當然好開心，杏兒今日喺ig貼上第一張聖誕全家福，佢同老公及囝囝Brendan一齊着到紅噹噹，由老公負責抱住囝囝，用強勁嘅臂彎攬到實一實，真係好溫馨。不過，兩夫婦都好保護小朋友，一直冇公開正面樣畀大家睇，今次就多咗半邊面，見到Brendan面珠肥嘟嘟，好似似爸爸多啲，好得意。杏兒留言﹕「我哋第一張聖誕家庭相，囝囝嘅聖誕Look真係好Cute！呢個係我人生中最快樂嘅聖誕！」

眾所周知，36歲嘅陳茵媺最生得，3年抱3，細女Camilla差唔多兩歲，今日茵媺上載合照，雖然冇着母女裝，但就幫囡囡用apps加咗副好sharp醒嘅黃色太陽眼鏡，睇到一樣咁開心。而38歲嘅陳敏之，最近做咗辣媽，喺《溏心風暴3》與唐文龍有多場床上激戰戲份，戲外就變返賢妻，同囝囝雷子樂影咗多張連環快拍，見佢搣住囝囝嘅面珠，自己就嘟嘴賣萌。

更多娛聞，喺晒《娛果》
http://fb.com/appledailyent