當年今日
關於我們

【仲有排等】業界望成立電影局 田啟文:特首反應正面

蘋果日報 2018/09/24 16:50

香港電影工作者總會吳思遠古天樂林鄭月娥特首田啟文

香港電影工作者總會連同多個電影屬會,今日喺特首辦工室同特首林鄭月娥見面,反映電影業界面對嘅困難,同時提出訴求。總會會長田啟文、總會永遠榮譽會長吳思遠、演藝人協會正副主席古天樂、林家棟、編劇協會代表莊澄等都有列席。
田雞會後接受《蘋果》電話訪問,講到業界今次提出兩點要求,特首嘅反應都好正面,佢話:「主要係兩大方面,第一希望特首可唔可以考慮成立電影局,其次係大磡村嘅重建區,可以畀地方我哋做培訓基地。」田啟文話課程目前難覓地方,雖然早前已經同地區代表傾過,房屋署、區議會同康文署都支持,但要有政策局執行先至可以成事。
田雞補充話有電影局成立可以避開好多官僚架構嘅阻攔,特首聽完之後,反應都好正面,田啟文話:「特首話成立政策局要好多時間,現屆政府未必做得到,係難嘅。佢又講到仲有好多社會行業,都想成立相關政策局,好似旅遊業咁。特首話可以由上至下,高層面話畀下面嘅人知,政府係支持電影發展。特首都表示個人係重視電影業。」
精選娛聞,喺晒《娛果》
http://fb.com/appledailyent