一個弱勢政府面對民情洶湧嘅雷曼迷債苦主，可以做得啲乜？除咗方寸大亂之外，拖字訣可能係唯一出路。

政府銀行角力白熱化

政府由雷曼爆煲，火速拋出以為獨步天下嘅絕世好橋──「責成」銀行按抵押品市價，向苦主回購迷債，到財金部門紛紛爭相蒲頭領功，演變至最近雷曼清盤人花旗國嘅大狀，突然公開發律師信，挑戰迷債託管人滙豐，令政府同銀行界之間台前幕後嘅角力，至此已經到咗白熱化地步。
香港作為國際金融中心，幾十年嚟，銀行業之間建立嘅官商合作關係，亦到咗危危乎嘅懸崖邊。
按照原來路線圖，銀行界上個禮拜日，會召開記者會，宣佈今個禮拜一，發信通知迷債苦主開始回購。不過明眼人都知，自從美國律師投下深水炸彈後，積極啲講，回購安排已經延遲咗；悲觀啲講，回購可能泡湯或變到走晒樣。不過政府就死唔肯認回購已無法進行，財爺日前仲同政黨話，一兩個星期可望展開回購。

苦主隨時再上街

華華聽聞，銀公連日嚟已經草擬咗份聲明，想向公眾交代吓，以免被認為銀行界玩嘢，內容大意係講，由於律師信引發巨大法律風險，回購工作碰到極大困難，之不過銀行界仍會積極諗辦法解決，唔會拉倒，前面嘅挑戰仍然好大……但係政府就唔准銀公出呢份聲明。
華華認為，錯就要認，打要企定，咁樣唔認唔講，再搞落去，雷曼苦主隨時又嚟逼爆玻璃㗎。

李華華
mailto:[email protected]