最近威爾斯親王醫院網頁入面多咗個連結，叫做糖尿病人士健康生活篇，入面澄清咗好多同糖尿病有關嘅謬誤，例如好多人以為，有糖尿病要做多啲運動，但原來血糖好高就千祈唔好做運動，因為做運動時身體需要大量糖份，如果胰島素唔夠，就唔可以將血液入面嘅糖份轉畀細胞備用，令到身體要分解脂肪做燃料。
但喺分解脂肪嘅時候，會產生酮酸，太多酮酸就會中毒，即係醫學上嘅「糖尿酮症酸中毒」，患者會非常口渴、多尿、呼吸時候有啲蘋果味，嚴重嘅仲會嗜睡、迷迷糊糊，甚至會昏迷致命㖭，所以糖尿病人血糖水平如果高到14mmol/L（毫摩爾）以上，就一定唔好做運動，快啲去睇醫生。
blog主：醫神