成龍好友曾志偉﹑陳自強﹑安志杰﹑馮德倫﹑江欣燕及張學友等，晚上陸續到達清水灣舊邵氏影城，為成龍慶祝60大壽。曾志偉約八點左右到達，佢喺馬路中心做訪問，仲派蚊怕水畀記者，佢話：「今日好多朋友都好關心，打電話嚟問我送乜嘢畀大哥，成龍乜嘢都有，仲有乜嘢可以送？嚟飲一杯就最好。」

問到請咗乜嘢朋友出席？志偉表示：「（張）學友﹑阿倫（譚詠麟），仲有好多舊朋友，啲人問要着乜嘢衫？我同佢哋講，唔使着衫0架喇。」

佢又話今晚有抽獎環節：「佢攞咗幾部電單車同電動車，同埋名錶及相機。」

咁今晚花費幾多錢？志偉表示：「場地係問方小姐（方逸華）借，知道係幫成龍搞，佢就話攞去啦，方小姐考慮嚟唔嚟，阿倫學友今晚上台唱歌，現場擺十幾圍，有自助餐及打邊爐。」問志偉有乜驚喜畀成龍？志偉笑言：「就係我唔飲醉。」

而學友到達時，較低車窗受訪，問到係咪嚟唱歌？佢話：「我唔知，我都唔知做乜。（志偉話唱歌？）要唱就唱。」學友表示成龍連私人飛機都有，所以唔知送乜嘢畀對方。

另外，黃秋生於八點左右，便駕車提早離開，咁啱陳芷菁今晚都喺度....

至於阿倫﹑陳友及阿B稍後亦到達，問阿倫送乜畀成龍？佢話：「送歌聲畀佢。」會唱乜嘢歌？佢話：「唱佢最鍾意《朋友》。」