去年嘅話題韓片，必定係由韓國型男孔劉、馬東石、鄭有美等主演嘅大熱韓片《屍殺列車》，《屍殺》除咗喺韓國受歡迎，喺亞洲各地都屢創佳績。

而近日《屍殺》嘅製片李東河就到咗台灣出席「國際製片工作坊」講座，佢亦有抽空接受台灣《蘋果》訪問，更大爆孔劉、馬東石及鄭有美都唔係角色嘅第一人選。

李東河提到《屍殺》男主角係一個冷靜理想嘅人，全程首要任務就係保護女兒，李東河話：「個性同年齡等形象都同孔劉好相近，所以就搵咗孔劉來演。」不過問到當初男主角第一人選係唔係孔劉時，李東河坦言唔係，大爆當初佢哋嘅心水人選因為行程上難以配合，最後先決定用孔劉，但係佢就冇透露當初第一人選係邊個。

至於片中馬東石同鄭有美呢一對夫婦亦都受到大家喜愛，當中馬東石飾演情深硬漢，為咗保護懷孕妻子不惜犧牲自己，而呢兩位演員同樣都唔係《屍殺》嘅第一人選，李東河話：「呢兩個角色我哋都煩咗好耐，馬東石同鄭有美都唔係我哋嘅首選，但係睇到佢哋對於角色嘅詮釋，我同導演都覺得佢哋比第一人選嘅演員仲適合。」

對於《屍殺》成功佢哋初時都冇預期過，不過佢覺得因為電影題材新鮮，所以先吸引到觀眾。而當初籌拍《屍殺》時資金上冇太大嘅問題，到電影開拍後要追加嘅預算就花咗唔少功夫。電影開拍後，佢同導演延尚昊亦開始擔心咁樣新穎嘅題材，觀眾是否能夠接受，佢話：「活屍嘅動作或者喺片中逃跑嘅場景，唔知道觀眾睇咗會唔會覺得好尷尬或陌生。」