【新增內容】

蕭潤邦(Oscar)今早9點接新娘江若琳，儀式按照傳統進行，下午兩點五十五分左右舉行婚禮，新娘江若琳由爸爸繑實步入會場，現場歡呼聲不絕，江若琳一直展露幸福笑容，江爸爸先同Oscar握手，再將愛女嘅手放在Oscar手上，示意二人上台。

Oscar讀誓詞時有啲緊張，佢全程哽咽：「你係我嘅蘋果，我係你嘅蘋果樹，如果曬，我同你擋太陽，落雨同你擋雨水，行雷就劈我先，好唔好呀？」江若琳聽到好感動，要用紙巾抹眼淚，Oscar承諾：「我會一生對你永遠不變，I love you！」

江若琳話今年認識Oscar已11年，佢話：「過去10年，我哋喺自己人生不斷各自有經歷同學習，感謝個天喺我覺得好絕望同灰心嘅時候，你用另一個身份出現，我曾問過你，你生得咁高大，係咪幫我擋風擋雨，你話唔係，你係會為我擋子彈，的確喺我人生裏面，做錯過好多嘅決定，但我有一樣嘢可以肯定，我今日選擇嫁俾你，係我生命中最無悔、最正確嘅選擇。」Oscar拎出紙巾為江若琳抹眼淚，雙方交換戒指，Oscar揭開新娘頭紗，二人深情一吻。

完成儀式，江若琳拋花球，JW接到花球後即大笑，面都紅晒，江若琳即攬住JW，JW男友Tarzan（葉韋彤）亦行前搭住JW膊頭，一齊影合照。

約傍晚6點幾，JW同男友Tarzan接受訪問，講到JW接到花球，問到係咪下次輪到佢，佢笑言︰「多謝，其實我都知道會係咁，噚日已經有記者問我會唔會搶花球，所以我諗住企後啲，點知一掉花球時，個個都推我出去，咁啱個花球喺我頭上面跌落嚟，我自己都笑到停唔到。」真係喜上加喜。

問到佢同男友Tarzan（葉韋彤）有冇計劃結婚？佢話︰「冇乜計劃，以工作行先，想趁後生賺多啲錢。」講到佢男友家底都好豐厚，佢表示想靠自己能力先。至於接到花球，男友有何反應？JW話︰「啲兄弟有拍片畀我哋睇，個個都恭喜我哋，佢咪喺度笑，冇乜嘢講。」

精選娛聞，喺晒《娛果》
http://fb.com/appledailyen