同女友鬧交有好多原因，根據康仔嘅非正式統計，接近5成辣著另一半嘅導火線，都同「記性」有關。

所謂「伴女如伴虎」，當你女朋友問你「記唔記得第一次乜乜乜係幾時？」嘅時候，就好似返學畀Miss抽中答問題一樣，梗會有少少淆底。康仔老友豬仔，就因為有個記性太好嘅女友，搞到連份工都冇埋！

豬仔以前喺電視台工作，呢行主要都係輪休，為咗大家舒服，阿頭對於份更表冇乜異議，總之各位手足夾得掂嘅話，鍾意放邊日就放邊日。不過豬仔就最多要求，一個月硬係有一堆必定要放假嘅日子，往往都要勞煩同事同佢調假。點解咁麻煩？咪因為條女囉！

豬仔：「唔好意思呀！我都唔想，但係紀念日嚟，要陪條女慶祝！」

同事：「你個個月都有特定幾日要放㗎喎？究竟你收埋幾多條女呀？」

豬仔：「唉！2號係心動紀念日，15號係拍拖紀念日，17號係kiss紀念日……」

同事：「……唔L係呀？」

豬仔：「冇辦法，全部都係被迫放，麻煩幫幫忙！」

心動都要紀念？冇錯，豬仔女友就係一個咁好記性、咁煩膠嘅女人！聽返豬仔講，由於佢成日要求同事調假，加上佢女友之後變本加厲，強迫豬仔要放晒所有星期六、日陪佢，令到一班手足冇晒啲好日放，卒之豬仔開始頂唔順同事嘅埋怨，最後決定辭咗份工。

畢業之後就喺電視台工作，焗住轉行嘅豬仔係就係做返正常人，返朝9晚6放星期六、日，奈何一路唔適應新工作。直至最近要儲錢結婚，先至重新考慮回歸電視行業，不過當阿頭知道豬仔當年係因為女友而離開呢行，已經斷定佢日後會再因為另一半而再辭職。最後？當然係唔請豬仔啦！

結果豬仔要繼續打一份自己唔鍾意嘅牛工，儲錢結婚任務亦都令佢好吃力。查實如果一個女仔，搞到你喺公司神憎鬼厭，連份工都冇埋，咁仲算唔算係一位好女友呢？

成日話「男人應以事業為重」，全心全意工作又被指責唔夠愛你；用晒所有時間陪你又話唔上進，真係人都癲。男人唔易做，識得體諒自己嘅女人亦唔易搵。有時為搵食真係身不由己，今日開始，不如試吓體諒另一半啦！

專欄作者簡介：
康仔
日頭返工攤抖，例牌遲到早走，收工約Friend飲酒，放假陪女玩狗。
一日冗員，一世冗員，我是康仔。

Facebook專頁：
https://www.facebook.com/mynameishonghong

發掘更多身邊的小城故事，請LIKE 蘋地Facebook Page，並設定為「搶先看」： https://www.facebook.com/appledailyland