當年今日
關於我們

毛玉萍晒染紅Hermès﹕ 有無數烈士的鮮血

蘋果日報 2012/10/20 06:00

手袋毛玉萍Hermès

惡搞無罪,晒命有理﹗今次女主角,係毛玉萍。

人家噚晚仲好開心,喺微博晒呢個oneandonlyone嘅愛國號Hermès手袋,仲寫住﹕「Hermès全球藝術總監PascaleMussard先生太有心了,那麼早就收到了他為我定制(訂製)的耶誕節禮物,很有中國特色,五星紅旗在我心裏飄揚!」噢﹗見到個手袋,如見毛主席;拎住出街,會唔會成日想喊?請問一個Hermès幾錢?毛玉萍會否考慮拍賣籌款幫助充滿中國特色嘅貧民?

之不過,毛玉萍犯咗個大錯,就係PascaleMussard,係女人來的。其次,佢咁樣炫耀法,微博班網民,唔寸爆你至奇。亦有人問﹕「烈士死了都未必能蓋國旗,PO主是甚麼身份可以背國旗包?」、「再牛的大牌在大天朝富豪面前都得跪!」「
愛馬仕的包包是無數革命烈士的鮮血染成的哦」。最攞命係呢句﹕「從沒見過這麼醜的包包﹗」

毛玉萍當然還擊,佢嘅回應,亦令人標淚﹕「正因為有無數烈士的鮮血,才有現在如此強大的民族!一款印有國旗的包對我來說,絕對比那些印有花草樹木的包更有收藏價值。」仲話女人當男人,係因為佢搞錯咗兩位總監嘅卡片。

之不過,拎住個「有無數烈士的鮮血」嘅Hermès出街,也太沉重太驚心動魄。有好心網民幫佢改圖,由五星拱照變成……變成國民黨黨旗徽號。

唔知毛玉萍覺得呢個袋袋又有冇收藏價值呢?